Министерот за надворешни работи и претседавач со ОБСЕ, Бујар Османи, во рамките на претседавањето со Организацијата во 2023 назначи двајца нови специјални претставници на претседавачот: за невладини организации, Андреа Стојковски, и за млади, Мемет Жаку.
Османи, како што наведуваат од МНР, во листата на свои специјални претставници ги додаде и овие две позиции покрај претходно назначените вообичаени специјални претставници на претседавачот на ОБСЕ, кои ќе му помагаат во неговата работа, со цел да се обезбеди подобра координација на напорите на земјите учеснички за промоција на улогата на овие области.
Стојковски и Жаку во рамките на своите мандати и во тесна координација со претседавачот Османи, а на линија на приоритетните цели наведени во програмата на претседавањето на Македонија, ќе дадат поддршка за реализирање на активностите што нам ни се битни, како и ќе придонесат за зајакнување на позицијата на невладиниот сектор и на младите во сите аспекти на ОБСЕ преку промоција на политичката димензија на нивните портфолија и соодветно застапување на интересните групи, организирање низа форуми, конференции и други слични настани.
„Задоволство ми е да ги претставам Стојковски и Жаку како мои специјални претставници во рамките на претседавањето со ОБСЕ за кои уверен сум дека достоинствено ќе се справат со позицијата. Перспективите и придонесите на граѓанското општество и на младите се значајни во работата на сите три димензии“, рече Османи.
Претседавачот Османи досега ги има назначено и следните лични (ЛП) и специјални претставници (СП): амбасадор Хенрик Виладсен, СП на ОБСЕ/проектен координатор во Украина, амбасадор Андреј Каспжик, ЛП за конфликтот што се адресира во рамките на Минската конференција на OБСЕ; амб. Томас Мајер-Хартинг, СП за процесот на разрешување на разликите поврзани со Транснистрија; амбасадор Виорел Мошану, СП за Јужен Кафказ; Лилијана Палиховичи, СП за родова еднаквост; Анита Рамасастри, СП за борба против корупција, Валиjант Ричи, СП за борба против трговија со луѓе, Исмаил Хаки Муса, ЛП за борба против нетолеранција и дискриминација кон муслиманите; Регина Полак, ЛП за борба против расизам, ксенофобија и дискриминација, исто така со фокус врз нетолеранција и дискриминација кон христијаните и припадниците на другите религии; Рабин Ендру Бејкер, ЛП за борба против антисемитизам; полковник Горан Василевски, раководител на групата на високо ниво на ОБСЕ за планирање.
