Со досегашните десет евакуациски летови организирани со помош на Европската Унија превезени се околу 1.000 патници од Блискиот Исток назад во Европа, соопшти денеска портпарол на Европската комисија на прес-конференција.
Тој појасни дека Комисијата може да покрие до 75 проценти од трошоците за летови организирани од земја членка на ЕУ, доколку најмалку 30 проценти од местата се наменети за државјани на други европски земји.
Според него, досега 18 држави членки побарале помош преку Европскиот механизам за цивилна заштита за враќање на нивните граѓани од различни земји на Блискиот Исток.
Портпаролот додаде дека во тек е голема европска операција за репатријација на граѓаните на ЕУ. Детали за организацијата на летовите, рече тој, не можат да се објавуваат од безбедносни причини.
