Убиството на Алекс Прети ја потресе нацијата и, според поранешниот претседател Барак Обама, треба да биде аларм за сите Американци дека основните вредности на САД се под закана. Обама посочува дека федералните органи за спроведување на законот и имиграциските агенти имаат тешка задача, но дека јавноста очекува тие да дејствуваат законски, одговорно и во соработка со локалните и државните власти. „Тоа не е она што го гледаме во Минесота, каде ситуацијата е спротивна“, вели Обама.
„Со недели, јавноста е згрозена од маскирани регрути на ИЦЕ и други федерални агенти кои дејствуваат без одговорност, користејќи тактики што изгледаат дизајнирани да заплашат и вознемират жители на голем град. Овие постапки кои поранешниот главен советник на Министерството за внатрешна безбедност ги нарекол срамни и сурови доведоа до смртта на двајца Американци, Алекс Прети и Рене Гуд“, додава поранешниот претседател.
Обама критикува дека сегашните функционери на администрацијата, наместо да воспостават дисциплина и одговорност, го ескалираат конфликтот со објаснувања за пукањата кои не се потврдени од сериозна истрага и противречат на видео-доказите.
„Ова мора да престане. Се надевам дека администрацијата ќе го преиспита својот пристап и ќе соработува конструктивно со гувернерот Волц, градоначалникот Фреј и локалната полиција за да се спречи понатамошен хаос“, пишува Обама. Тој исто така ја искажа поддршката за мирните протести кои се одржуваат низ САД, особено во Минеаполис.
„Секој Американец треба да ги поддржи овие мирни протести и да се потсетува дека е наша одговорност како граѓани да се спротивставиме на неправдата, да ги заштитиме слободите и да ја држиме власта одговорна“, заклучува Обама.
