Станбените, деловните и колективните објекти на подрачја каде е можно приклучување на систем за топлинска енергија, задолжително ќе мора да имаат целосна инсталација за парно греење. Ова е предвидено со Предлог-законот за изменување на Законот за градење, кој денеска доби поддршка од Комисијата за транспорт, дигитална трансформација, животна средина и просторно планирање.
Со измените се очекува поефикасно користење на енергијата, заштита на топлината и намалување на загадувањето во зимскиот период.
– Измените се донесуваат како одговор на практичните проблеми со обезбедување квалитетно и унифицирано снабдување со топлинска енергија. Целта е да се постави стандард за модерно урбано живеење и да се намали загадувањето во зимските месеци, соопшти Владата.
