Бебе е спасено од утробата на бремена Палестинка која беше убиена во израелски воздушен напад врз јужна Газа, соопштија лекарите во понеделник.
Според Палестинската црвена полумесечина, бебето е породено од медицински тимови во теренска болница во Ал-Маваси.
Мајката на детето е убиена во израелски напад чија цел била куќа во Ал-Маваси, западно од Кан Јунис.
Истиот ден, израелската војска ги обнови воздушните напади низ Појасот Газа, при што загинаа најмалку 50 лица, а десетици други беа ранети.
Израел има блокада врз Газа веќе 18 години, а сите гранични премини се затворени од 2 март, што дополнително ја влошува хуманитарната криза за 2,4 милиони луѓе што живеат таму.
И покрај меѓународните повици за прекин на огнот, израелската војска спроведува офанзива врз Газа од 7 октомври 2023 година, при што загинаа речиси 60.000 Палестинци, претежно жени и деца. Немилосрдното бомбардирање ја опустоши енклавата и предизвика сериозен недостиг на храна.
Меѓународниот кривичен суд издаде налози за апсење во ноември минатата година за израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел се соочува и со обвинение за геноцид пред Меѓународниот суд на правдата поради неговата воена кампања во Газа.
