Петчлената комисија формирана од министерот за здравство, која вршеше стручен надзор за случајот со 39-годишната родилка која скокна од прозорец на Гинекологија, не утврди пропусти во нејзиниот третман.
„Биле направени сите неопходни медицински процедури, кај сега покојната пациентка и не била регистрирана депресивна психотична симптоматологија. Според Комисијата пациентката не изгубила контакт со реалитет и не можело да се предвиди ваков немил настан“, се наведува во извештајот на Комисијата испратен од Министерството за здравство.
Претходно Државниот санитарен и здравствен инспекторат, по вонредниот инспекциски надзор во скопска гинекологија констатираше дека ГАК направиле пропуст бидејќи докрај не ја спровеле постапката за обезбедување на психијатар.
39-годишната родилка почина на КАРИЛ две недели откако скокна од прозорец на ГАК.
