Тина Тарнер размислувала за потпомогнато самоубиство седум години пред смртта.
Музичката икона, која почина на 83-годишна возраст во средата во својот дом во близина на Цирих, по долгогодишните здравствени проблеми размислувала за евтаназија пред нејзиниот сопруг музички продуцент Ервин Бах (67) да го донира својот бубрег за неа.
Таа во своите мемоари, „Тина Тарнер: Мојата љубовна приказна“, вели: „До декември 2016 година, моите бубрези беа на ново ниско ниво од само 20 отсто и забрзано паѓаа.“
„И се соочив со два избора: или редовна дијализа или трансплантација на бубрег.“
„Тоа не беше моја идеја за живот. Токсините во моето тело ја презедоа контролата. Не можев да јадам. Преживував, но не живеев.“
Токму во тој момент нејзиниот сопруг ѝ понудил бубрег, а донацијата се случила во 2017 година. Тина пишува во книгата: „Тој рече дека не сака друга жена или друг живот; ние бевме среќни и тој ќе направи сè за да нè задржи заедно.“
Откако ја објавија тажната вест во средата преку „Инстаграм“ без да се прецизира причината, тимот на пејачката во четвртокот соопшти дека е природна смрт.