Соопштение за јавност на Левица:
Пратеничката од Левица, Јована Мојсоска, преку социјалните мрежи информира дека поднела иницијативи до Министерство за енергетика и Министерство за животна средина и просторно планирање, со барање за вонреден инспекциски надзор над сите субјекти што поседуваат дозволи за експлоатација на територијата на Струга, но и над оние кои, според неа, работат незаконски и без важечки договори.
Според Мојсоска, безредието, институционалната пасивност и корумпираноста во системот довеле до апсурдна состојба – „градот на две води” да остане без вода. Таа предупредува дека е неопходна итна и сеопфатна контрола на сите концесионери и економски субјекти што вршат експлоатација, со цел да се утврди дали токму тие активности придонеле за актуелната криза.
Воедно, таа упати јавен апел до Министерство за внатрешни работи и до Основно јавно обвинителство Струга да постапат по допрен глас и да не чекаат нов еколошки инцидент за да ги утврдат евентуалните незаконски активности и злоупотреби.
„Не смее да се дозволи поединци да остваруваат милионски профити преку незаконска експлоатација, додека цената ја плаќаат Стружани “, посочува Мојсоска и додава дека „секој купен глас скапо кошта”.
