Околу 70 проценти од граѓаните на САД се против американска воена интервенција во Венецуела, покажа анкета нарачана од американскиот радиодифузер Си-Би-Ес (CBS).
Само 13 проценти од испитаниците во анкетата објавена вчера рекле дека јужноамериканската земја претставува „голема закана“ за безбедноста на САД, додека 76 отсто рекле дека претседателот на САД, Доналд Трамп, не ја „објаснил јасно“ својата позиција во врска со воената акција.
Како што пренесува ДПА, американската војска во моментов собира сили на Карибите. Во последните недели, вооружените сили уништиле околу 20 чамци што им припаѓале на осомничени шверцери на дрога во регионот, а повеќе од 80 луѓе се убиени, според американски податоци.
Официјално, американската влада ја наведува борбата против нарко картелите како причина за нејзината интервенција. Венецуела, од друга страна, силното воено присуство на САД го гледа како заканувачки гест.
Пред една недела, Вашингтон го класифицира таканаречениот Картел де лос Солес (Cartel de los Soles – Картел на сонцата) како странска терористичка организација.
Американскиот Стејт департмент го обвинува венецуелскиот претседател Николас Мадуро дека го предводи наводниот картел, за кој се вели дека е криминален синдикат составен од офицери на венецуелските вооружени сили.
Сепак, безбедносните експерти се поделени околу тоа дали картелот воопшто постои како организирана група.
