Министерката за финансии, Гордана Димитриеска-Кочоска, денеска во својата канцеларија во Министерството прими гостин кој не е службено поврзан со државната каса – туку со локалната политика. Станува збор за Сотир Лукровски, кандидат за градоначалник на Општина Карпош од редовите на ВМРО-ДПМНЕ. Со него бил и пратеникот Тони Јаревски.
Иако средбата е претставена како „пријателска и конструктивна“, прашањето што се наметнува е: дали е соодветно државна институција да се користи како простор за средби со партиски кандидати во работно време?
„Разговаравме за претстојните локални избори и за важноста на визијата и одговорниот пристап во управувањето со општините. Карпош заслужува нова енергија посветена на граѓаните, чесна и ефикасна локална власт“, напиша министерката на својот Фејсбук профил, споделувајќи фотографија од средбата.
Со ова, Димитриеска-Кочоска отворено се пофали со поддршката кон Лукровски – во својство на министерка и функционер на ВМРО-ДПМНЕ – оставајќи впечаток дека институцијата и партијата се едно.
Правната регулатива не забранува комуникација меѓу министри и кандидати, но постои јасна разлика меѓу службени државни обврски и партиски активности. А кога се случуваат во работно време, во институционални простории, линијата станува тенка и опасна.
Опозицијата и граѓанскиот сектор одамна предупредуваат на опасноста од „партизација на институциите“, а ваквиот пример само ја потврдува тенденцијата на мешање на државни ресурси со партиска агенда.
Останува отворено прашањето: дали секој кандидат за градоначалник ќе добие прием кај министерката, или оваа „гостопримливост“ важи само за своите?
