Грчкиот премиер Кирјакос Мицотакис изјави дека состанокот со земјоделците е наменет за оние кои се подготвени за дијалог, нагласувајќи дека не може да се принуди никого да учествува. Средбата ја организираа со претставници на 18 блокови кои минатиот месец се одвоија од останатите земјоделци и побараа разговор со владата. Останатите 55 блокови одлучија да не дојдат, наведувајќи дека владините ограничувања за бројот на претставници го намалуваат ефектот на дискусијата.
Мицотакис рече дека состанокот ќе овозможи продуктивна дебата за проблемите на примарниот сектор, оценка на веќе преземените мерки и идентификација на можности за подобрување, како и разгледување на локални прашања. Тој додаде дека е потребна и поширока дискусија за иднината и модернизацијата на секторот, со цел решенијата да се применат во пракса.
