Со свечена заклетва, Бојан Маричиќ и официјално го започна својот мандат како нов претседател на Државната изборна комисија (ДИК). По преземањето на функцијата, тој најави ново професионално поглавје обележано со целосна посветеност на обврските и јакнење на улогата на Комисијата како еден од клучните столбови на демократијата.
Во својата прва изјава, Маричиќ истакна дека приоритет во неговиот мандат ќе бидат законитоста, транспарентноста и непристрасноста во сите изборни процеси. Тој најави унапредување на капацитетите на стручната служба и континуирана работа на зголемување на довербата и угледот на ДИК во јавноста.
„Нашата обврска е да ја зајакнеме довербата кај граѓаните и да ја позиционираме Државната изборна комисија како вистински гарант на демократските вредности и изборните стандарди“, нагласи Маричиќ.
Новиот претседател на ДИК упати благодарност до пратениците за укажаната доверба, како и до политичката партија што ја поддржа неговата кандидатура. Воедно, им честиташе и на останатите членови на Комисијата, изразувајќи уверување дека со заеднички, професионален и одговорен пристап ќе придонесат за натамошен демократски развој и фер изборни процеси во интерес на целото општество.
