Лекарската комора со загриженост ги следи информациите поврзани со д-р Игор Кузмановски и укажува дека докторската професија има специфична димензија која налага високо етичко и морално однесување.
Ова е ставот на Комората откако на социјалните мрежи беше објавено видео на кое се гледа како директорот на Клиниката за неврологија Кузмановски подготвува прашок за шмркање и зборува за купување кокаин, по што експресно беше разрешен од министерот за здравство Азир Алиу.
„Лекарот е обврзан во професионалниот и во приватниот живот да ги негува и да ги покажува личните квалитети, соодветни на местото и достоинството на лекарската професија во општеството. Лекарот треба да е свесен дека со секој несоодветен, лекомислен, нечесен и понижувачки акт, покрај тоа што се компромитира самиот ги компромитира и сите други колеги“– велат од Лекарска комора на Македонија.
Оттаму додаваат дека конкретниот случај и расположливите информации поврзани со него ќе бидат разгледани од страна на органите и телата на Комора, кои ќе постапат согласно надлежностите.
