Рускиот министер за надворешни работи Сергеј Лавров денеска изјави дека ЕУ бара од Белград да се придржува до надворешната политика на Брисел како предуслов за продолжување на европските интеграции и дека, според него, нема сомнеж дека Брисел тоа го сфаќа како вклучување на Србија во војната во Украина.
Тој посочи дека, во контекст на постојаната посветеност на Белград кон европската перспектива, Москва подолго време ги прашува своите српски колеги како ќе се справат со двата ултиматуми од Брисел – барањето за признавање на независноста на Косово и барањето за целосно усогласување со надворешната и безбедносната политика на ЕУ, вклучително и приклучување кон антируските санкции, објави 4news.mk
„Ова прашање останува актуелно бидејќи бриселската бирократија јасно разбира дека Србија се нашла во многу тешка ситуација. Не се сомневам дека, барајќи целосна поддршка за надворешнополитичките и безбедносните активности на ЕУ, бриселската бирократија го бара истото и од Србија и дека, пред сè, тоа го сфаќа како приклучување кон војната против Украина“, изјави Лавров, пренесе ТАСС.
Тој исто така укажа на, како што рече, неприфатливоста од префрлање српско оружје во Киев.
Како што наведе, Москва претпоставува дека Белград се придржува до договорот за спречување испорака на српско оружје во Киев и дека тој документ сè уште е во сила.
„Имаше информации за српско оружје, произведено во Србија, кое паднало во рацете на режимот на (украинскиот претседател Володимир Зеленски) и било користено во неговите напори да ги оствари своите нацистички, русофобни цели“, истакна шефот на руската дипломатија.
Тој додаде дека овие податоци ги објавила руската Надворешна разузнавачка служба и дека за тоа било разговарано со претставници на српските власти.
„Постигнат е договор за ова прашање. Поаѓаме од претпоставката дека договорите постигнати со нашите српски пријатели остануваат во сила“, рече Лавров, одговарајќи на прашање за билатералните односи меѓу Москва и Белград.
Руската Надворешна разузнавачка служба минатата година соопшти дека Србија користела тајни рути за извоз на воена опрема во Украина. Истиот ден Србија го запрела извозот на муниција, наведува ТАСС.
Претседателот на Србија, Александар Вучиќ, потоа изјави дека Белград, според локалните закони, не може директно да испорачува оружје во Киев и дека српското оружје може да влезе на украинска територија само преку други земји.
Тој на крајот на јуни минатата година соопшти дека Србија го запрела извозот на гранати и вовела обврска за посебни дозволи за нивен транспорт во странство, пренесува Танјуг.
