Премиерот Димитар Ковачевски планира во наредните 10 дена да го покани на лидерска средба, првиот човек на ВМРО-ДПМНЕ, Христијан Мицкоски. Како што кажа премиерот, разговорите би биле на две теми – одлуки за интеграција во ЕУ и усогласување на ставови за односи со сите соседни држави.
„Мицкоски мора прво да си ги среди своите ставови, јас планирам да го поканам во наредните 10 дена на средба“, рече Ковачевски.
По најавата за лидерската средба одговор стигна и од ВМРО-ДПМНЕ. Од тука велат дека кога станува збор за националните и државни интереси на Македонија, Мицкоски е подготвен да разговара во било кое време.
Доколку постои желба за национално единство и слушање на гласот на мнозинството, велат од ВМРО-ДПМНЕ, прифаќаме лидерска средба на која треба меѓудругото да се види што ќе се прави во периодот по неуспехот на тие уставните измени и иднината на граѓаните која треба да се обезбеди.