Министерката за култура Бисера Костадиновска Стојчевска на Светскиот ден на театарот испрати честитка до актерите и до театарските работници.
„На Светскиот ден на театарот, чест ми е да ви се обратам на сите и со вас да споделам дека театарот е непроценлив дел од нашето културно наследство и игра клучна улога во обликувањето на општеството.Вашата сцена е моќна за да ги изразите нашите заеднички перспективи, да иницирате дијалог и да поттикнете емпатија. Вие знаете како умешно да ги оживеете приказните и преку својот јазик, драма и музика, имате способност да ги надминувате бариерите и да ги поврзувате луѓето. Во време кога пред светот се надвиснати предизвици, театарот се покажа како светилник на надеж и издржливост. Духот на театарот никогаш нема да престане да живее и да создава. Оддавам признание на Факултетот за драмски уметности, но и на сите актери, драматурзи, режисери, сценаристи, театарски работници – вашата посветеност, талент и креативност го заслужуваат најголемиот аплауз. Додека го славиме театарот ги потврдуваме нашите заложби за зачувување и промовирање на ваквата уметничка форма. Министерството за култура постојано ги поддржува вашите активности. За 2024 година се издвоени 38 милиони денари за националните установи, 22 милиони денари за останатите корисници, како и осум милиони денари за драмски фестивали.Ние знаеме како да го направиме театарот платформа за подигање на свеста за важните општествени и социјални прашања. Затоа сите ние како публика мораме да ја вкусиме магијата и да ја осетиме моќта на театарската сцена“ стои во честитката на Костадиновска Стојчевска.
