Израелскиот премиер Бенјамин Нетанјаху денеска најави дека „ќе дејствува веднаш“ за забрана на катарскиот медиум Ал Џезира да работи во Израел, откако Кнесетот ја одобри забраната. „Терористичкиот канал Ал Џезира повеќе нема да емитува од Израел. Имам намера веднаш да дејствувам во согласност со новиот закон за да ги стопирам активностите на каналот“, објави Нетанјаху на социјалната мрежа Икс. Кнесетот денеска одобри мерка со која се овозможува привремена суспензија на работата на странските медиуми, што се толкува како закана за националната безбедност. Законот што беше одобрен денеска ќе им овозможи на Нетанјаху и на владата да ги затворат медиумите во период од 45 дена, со можност за обновување по тој период. Мерката ќе остане во сила до крајот на јули или до крајот на воените операции во Газа, пишува Ројтерс. Ниту седиштето на Ал Џезира во Израел, ниту катарската влада во Доха сè уште не одговориле на барањето на Ројтерс за коментар. Израелскиот министер за комуникации Шломо Караи ја обвини Ал Џезира, која известува директно од Појасот Газа и ја критикуваат воената акција на Израел, дека поттикнува непријателство кон неговата земја. Тој рече дека е „невозможно да се толерира“ таа медиумска куќа, која „одвнатре дејствува против Израел, особено во време на војна“. Израелските власти долго време се жалат на работата на Ал Џезира, но не постапуваа подалеку од критики, со оглед на финансирањето на Катар за палестински градежни проекти во Појасот Газа. Одлуката на владата да ги затвори локалните канцеларии на странски медиумски групи ги загрижи САД, најголемиот сојузник на Израел, кој вели дека е клучно да се одржи слободата на медиумите. „Ако е вистина, потегот е вознемирувачки“, рече портпаролката на Белата куќа Карин Жан-Пјер. Од почетокот на војната во Газа, Доха дејствуваше како посредник во преговорите меѓу двете страни, вклучително и во договорот според кој беа разменети дел од заложниците. Но, се чини дека разговорите за ново примирје не постигнуваат напредок. Во јануари Нетанјаху јавно повика на поголем притисок врз Катар со цел тој да изврши поголем притисок врз Хамас. Заливската држава е дом на политичката канцеларија на милитантното движење, како и неколку нејзини функционери.
Израел ја забрани телевизијата Ал Џезира- САД изразија загриженост
