Десничарската премиерка на Италија, Џорџа Мелони, се сретна со папата Франциско и со највисоките претставници на Ватикан и одржа срдечни разговори, соопшти Светата столица.
Во октомври Мелони ја презеде функцијата шеф на најдесничарската влада во повоената историја на Италија.
Оваа 45-годишна католичка конзервативка се противи на абортусот, се сомнева во правата на ЛГБТ-лицата и се дефинира како „мајка“, „Италијанка“ и „христијанка“. Но, има разлика меѓу неа и папата бидејќи папата Франциско е гласен бранител на правата на мигрантите, а Мелони се залага за строга гранична политика.
Средбата меѓу премиерот и папата траеше 35 минути по што Мелони разговараше со кардиналот, државниот секретар Пјетро Паролин и со надбискупот Пол Ричард Галагер, министерот за надворешни работи на Ватикан.
„За време на срдечните разговори, Мелони, Паролин и Галагер разговараа за „многубројни прашања поврзани со италијанската социјална ситуација“, вклучително сиромаштијата, семејните прашања, образованието и демографската криза, соопшти официјален Ватикан.
Тие разговараа и за Европа, Украина и за миграцијата, се додава во соопштението, но не откривајќи детали.
Мелони на средбата со папата Франциско дошла облечена во црно, придружувана од својот невенчан партнер, телевизиски новинар, и нивната шестгодишна ќерка.