Групата Исламска држава (ИД), поразена во Ирак и Сирија, ја објави смртта на нејзиниот водач, Абу Хасан ал Хашими ал Кураши, прецизирајќи дека тој бил убиен „додека се борел против непријателите на Бога“.
Во аудио-порака, портпаролот на џихадистичката група објави дека е назначен нов „калиф на муслиманите“, Абу Ал-Хусеин ал-Хусеини ал Кураши.
Портпаролот на групата, Абу Омар ал-Мухаџир, не кажа во својата порака како загинал водачот на групата.
По подемот во 2014 година во Ирак и Сирија, и освојувањето на огромни територии, ИД го доживеа соборувањето на својот самопрогласен „калифат“ под влијание на последователните офанзиви во тие две земји, во 2017 и 2019 година.
Оттогаш, организацијата беше дестабилизирана неколку пати со смрт или апсење на нејзините водачи.
Првиот водач на ИД, Абу Бакр ал Багдади ал Кураши, беше убиен во американски напад во Сирија во 2019 година, а неговиот наследник беше елиминиран во февруари во операција на американските специјални сили во северозападниот дел на таа земја.
