Фудбалерите и навивачите на Беса од Челопек тргнале да ги линчуваат судиите во општинската лига на Тетово на гостувањето во Брвеница кај Вардар. Само брзата реакција на полицијата спречила поголем инцидент и физички напад над судиите и делегатот, објави МВР.
Според полицискиот извештај, фудбалерите и навивачите на Беса биле револтирани од една судиска одлука, па тргнале во линч на арбитрите и делегатот. Натпреварот не се доиграл.
„Вчера (9 април) во СВР Тетово пријавено е дека во текот на второто полувреме од првенствениот фудбалски натпревар помеѓу екипите на Вардар од Брвеница и Беса од Челопек, незадоволни од донесената судиска одлука, четириесетина навивачи и резервни играчи на Беса влегле на теренот и се обиделе физички да се пресметаат со судиите и делегатот на натпреварот. Со интервенција на полициските службеници на СВР Тетово, тие биле спречени во намерата, но продолжиле да се однесуваат агресивно, по што натпреварот е прекинат. Се преземаат мерки за расчистување на случајот и за санкционирање на инволвираните“, објави МВР.
