Генералниот секретар на ОН, Антонио Гутереш изрази жалење што Советот за безбедност на ОН не успеал адекватно да одговори на војната меѓу Израел и Хамас во Појасот Газа и руската инвазија на Украина, и рече дека овие конфликти „можеби фатално“ го поткопале авторитетот на најважното тело на светската организација.
Тој ова го истакна денеска за време на отворањето на 55-та седница на Советот за човекови права на ОН во Женева, истакнувајќи дека Советот за безбедност често се наоѓа во ќорсокак и дека „не е способен да преземе активности за најважните прашања за мирот и безбедноста во наше време“.
„Недостигот на единство во Советот за руската инвазија на Украина и израелските воени операции во Газа по ужасните терористички напади на 7 октомври сериозно, а можеби и фатално го поткопаа неговиот авторитет“, рече генералниот секретар на ОН.
На Советот, додаде Гутереш, му требаат сериозни реформи во однос на неговиот состав и неговите методи на работа.
