Генералното собрание на Обединетите нации (ОН) денеска ја усвои првата резолуција за вештачка интелигенција (ВИ) за поддршка на меѓународните напори да се осигура дека оваа нова технологија ќе биде од корист за сите нации, ќе ги почитува човековите права и дека е „безбедна, сигурна и доверлива“.
Резолуцијата беше поднесена од САД и беше усвоена со консензус бидејќи за неа гласаа сите 193 земји-членки на ОН.
Американскиот советник за национална безбедност, Џејк Саливан, претходно овој месец изјави дека усвојувањето на резолуцијата ќе означи „историски чекор напред“ во охрабрувањето за безбедно користење на вештачката интелигенција.
Резолуцијата „претставува глобална поддршка за основниот сет на принципи за развој и употреба на вештачка интелигенција и ќе го отвори патот системите за вештачка интелигенција секогаш да се користат за управување со ризици“, рече тој.
Резолуцијата ги повикува сите земји, регионални и меѓународни организации, технолошки заедници, граѓанското општество, медиумите, академската заедница, истражувачките институции и поединците „да развијат и поддржат регулаторни и управувачки пристапи и рамки“ за безбедни системи за вештачка интелигенција.
Се предупредува на „неправилно или злонамерно дизајнирање, развој, примена и употреба на системи за вештачка интелигенција, како што се без соодветни заштитни мерки или на начин што не е во согласност со меѓународното право“.
Резолуцијата го признава брзиот напредок во развојот и употребата на вештачката интелигенција и ја нагласува „итноста од постигнување глобален консензус за безбедни, сигурни и доверливи системи за вештачка интелигенција“.
Исто така, се признава дека „управувањето со системите за вештачка интелигенција е област што се развива“ за која се потребни дополнителни дискусии за можните пристапи за управување.
Според текстот на резолуцијата, главната цел е да се користи вештачката интелигенција за да се поттикне напредокот кон постигнување на развојните цели на ОН до 2030 година, кои вклучуваат ставање крај на глобалната глад и сиромаштија, подобрување на здравјето ширум светот, обезбедување квалитетно образование за сите деца и родова еднаквост.
Резолуцијата ги повикува 193-те земји-членки на ОН и другите да им помогнат на земјите во развој да пристапат до придобивките од дигиталната трансформација и безбедните системи за вештачка интелигенција. Во неа се нагласува дека човековите права и основните слободи мора да се почитуваат, штитат и промовираат во текот на животниот циклус на системите за вештачка интелигенција.
Големите технолошки компании ја поддржуваат потребата за регулирање на вештачката интелигенција, додека лобираат да се осигураат дека тие правила ќе бидат во нивна полза.
Европскиот парламент ги усвои првите сеопфатни правила во светот за вештачката интелигенција на седницата на 13 март, кои треба да стапат во сила во мај или јуни откако ќе бидат доработени.
Други земји, како што се САД, Кина и други земји-членки на Групата 20 индустриски развиени земји, исто така работат на прописи за вештачка интелигенција.
