Првиот потпретседател на Владата и министер за политички систем и односи меѓу заедниците, Артан Груби, денес во Тирана го потпиша „Договорот за соработка меѓу Владата на Република Северна Македонија и Владата на Република Албанија за развој на инфраструктурни проекти, логистичка безбедност и ефикасност на транспортот на стоки меѓу двете земји“.
Рече дека му е задоволство што е дел од иднината преку еден креативен, современ и транспарентен пристап од страна на Владата на Република Албанија, овој пат преку мега проектот за пристаништето во Драч, исклучително значаен проект за албанската економија и туризам, но и со значително влијание врз економскиот развој на Македонија.
„Дозволете ми во името на Владата да ви честитам за оваа иницијатива, за оваа инвестиција која претставува иновативна и модерна димензија во нашите простори. Овој проект ги надминува димензиите на еден национален проект, тој е проект од стратешко значење за развојот на Западен Балкан. Уште повеќе, тежината на овој проект кој вие почнувате да го реализирате во однос со мојата земја, го зголемува проектот кој е главен приоритет на Владата на Република Северна Македонија, изградбата на патниот и железничкиот дел од Коридорот 8 што ќе го олесни и модернизира движењето на моите сограѓани до просториите на пристаништето во Драч, но и до Албанија воопшто. Два големи проекти, инвестиции кои ќе останат во служба на идните генерации и кои уште повеќе ќе ја зацврстат нераскинливата врска меѓу граѓаните на нашите две земји и меѓу земјите од Западен Балкан“, рече Груби.
Додаде дека со изградбата на автопат со 6 ленти од Скопје до Ќафасан, растојанието помеѓу Скопје и Тирана ќе се намали на 2,5 часа, Скопје и Валона на 3 часа. За максимално искористување на пристапот до пристаништето, планиран е почеток на изградбата и на железничката врска Скопје – Кичево – Поградец – Драч.
„Во јануари ги спојуваме двете гранични контроли во една, со цел конечно да ги отстраниме границите меѓу нас. Ја градиме и интерконективната енергетска врска меѓу нас со два проекта, трафостаница во Охрид и високонапонска врска Битола-Елбасан. Бројни се скептиците кои не веруваат во реализација на проектите што ги имаме започнато за да бидеме заедно, за да ги отстраниме границите меѓу нас, бројни се и ќе бидат оние кои ќе се обидат да направат опструкции, да ја потценат нивната тежина, но наша должност е да продолжиме со работа размислувајќи за идните генерации и за она што можеме да им го оставиме денес како наследство и основа за здрава иднина“, рече Груби.
Една новост за која разговарале со премиерот Рама на заедничката седница меѓу нашите две влади е изградбата на суво пристаниште во градот Струга, нова и креативна димензија на комуникација која несомнено, како што посочи, ќе придонесе за зајакнување на трговската размена меѓу нашите земји и е составен дел од изградбата на новото пристаниште Драч.
Тој им заблагодари на Рама и на албанската влада за нивната „великодушност, подготвеност и решителност да го споделат пристапот до пристаништето со Северна Македонија и Косово“.
