Грчката крајбрежна стража вечерва соопшти дека во близина на брегот на островот Крит спасила 117 мигранти од Либија и дека се уапсени три лица осомничени дека ги криумчареле.
Вкупно 84 мажи, две жени и 31 малолетник биле во чамец закотвен во залив на југот на островот Крит, што го користеле рибари.
Мигрантите рекоа дека го напуштиле Тобрук во Либија во четвртокот и се упатиле кон Италија, соопштија грчките власти.
Заедно со Италија, Грција е на првата линија на пристигнување на мигранти кои сакаат да влезат во Европската унија преку Медитеранот, од Турција или Северна Африка.
Околу 45.000 баратели на азил пристигнаа во Грција минатата година, од кои повеќето на островите во близина на турскиот брег.
