Во пресрет на зимската сезона, Секторот за заштита на животната средина на Град Скопје издаде препораки до граѓаните со цел подобрување на квалитетот на амбиенталниот воздух. Граѓаните се повикуваат редовно да ги чистат оџаците и да ги одржуваат печките, како и да избегнуваат горење отпад, прегорено масло, лакирани дрвени отпадоци, гуми, стиропор и други синтетички материјали.
„Да се користи суво и чисто дрво за затоплување, без примеси од земја и отпадоци, печките на дрво да се користат и одржуваат според упатствата на производителот и да се врши редовен сервис на котли, печки и клима-уреди за ефикасно согорување и помалку емисии на штетни материи“, препорачуваат од Градот Скопје.
Паралелно со препораките, градските власти најавија засилени инспекциски контроли на сите постројки со елаборати за животна средина или Б-интегрирани еколошки дозволи. Посебен акцент ќе биде ставен на спречување и санкционирање на нелегално спалување отпад.
