Министерот за надворешни работи, Бујар Османи, денес, одржа годишен брифинг со невладините организации ставајќи акцент на улогата на граѓанскиот сектор во креирањето на надворешната политика.
Османи, пред сè, даде краток осврт на сработеното во 2022 година, но ги истакна и успесите и ги посочи предизвиците, кои се резултат на многубројните активности што беа на агендата во текот на годината.
Османи рече дека 2022 година покажа дека надворешната политика на Северна Македонија останува на вистинската страна на историјата, но воедно потенцира дека поминаа времињата кога надворешната политика ја креираа само политичарите, а ја спроведуваа единствено дипломатите.
„Степенот на демократскиот развој на едно општество, според мене, се мери според два критериума: по грижата кон најранливите категории и по инволвираноста и влијанието што граѓанскиот сектор го има врз политиките“, истакна Османи, при што додаде:
„Како министер за надворешни работи исклучително сум сензитивен кон мислењата, активностите и придонесот на граѓанскиот сектор во однос на надворешната политика“.
