Екс министерот за здравство, сегашен пратеник и кандидат за прв човек на СДСМ, Венко Филипче, се јави со реакција по повод изгласувањето на Законот со кој се зголемија министерствата во новата Влада, откако ВМРО-ДПМНЕ доби поддршка и од пратениците на ДУИ.
„Во рекордно време, ВМРО-ДПМНЕ ги предаде граѓаните и ја изневери довербата која им ја дадоа. Надежта никогаш пократко не траела.
Кампањата против ДУИ се претвори во дилови за гласање. Која е цената допрва ќе видиме.
Ветувањето за помала администрација се претвори во плус четири министерства, без никаква оправданост или дебата. Целта е повторно дил за поделба на власта.
Ветувањето за намалување на задолженоста се претвори во најава за земање кредит од милијарда евра. Допрва ќе видиме и зад ова каков дил се крие.
Ветувањето за подобри договори во меѓународната политика се претвори во отворање на веќе затворени проблеми и прашања. Едноставно катастрофа“, напиша Филипче.
