Претседателот на СДСМ Венко Филипче вечерва изјави оти очекува на локалните избори партијата да постигне оптимум, дека ги избрале најдобрите кандидати за градоначалници и оти во првиот круг на изборите ќе настапуваат со нивните кандидати. Во моментов, кажа Филипче, немаат никаква соработка со ДУИ. За дел од независните имаат сомневања, како што кажа, дека се вистински независни, посебно за Центар за што деновиве ќе ги информираат граѓаните.
– Засега сме фокусирани на првиот круг на изборите каде настапуваме со наши кандидати. Ги избравме најдобрите кандидати. Сметам дека тоа се кандидати кои потекнаа од своите средини. Луѓе кои имаат и кредибилитет и легитимитет да излезат пред граѓаните, да ги презентираат програмите, рече Филипче во Тема на денот на ТВ Сител.
Според него, програмите се креираат според потребите на општините. Најави и една, како што кажа, „чадор програма“ со некои главни аспекти коишто ќе важат насекаде, а тоа е безбедноста и осветлувањето на улиците, хигиената, чистотата…
– Ќе им ветам уште сега на скопјани дека Скопје никогаш нема да се повтори како што е сега со градоначалничката поддржана од ВМРО-ДПМНЕ, а дека тоа што јас гарантирам за секој еден наш кандидат е дека ќе биде чесен, рече Филипче.
Лидерот на СДСМ рече дека тие не ја рехабилитираат ДУИ и оти ги научиле лекциите од таквите коалиции, како и дека сега коалицирањата се темелат на вредносни политики, програми и.т.н.
– Во овој момент немаме никаква соработка со ДУИ. Ја научивме лекцијата и добра лекција е тоа и ја користиме во градењето на коалициите со сите политички партии сега, но дефинитивно го гледаме тоа приближување, функционирање меѓу ДУИ и ВМРО-ДПМНЕ, рече Филипче.
Во однос на независните кандидатури, претседателот на СДСМ кажа дека тие дале поддршка за намалување на потписите за кандидирање, но дека владејачкото мнозинство не се обидела да ги собере потребните гласови за Бадентер. Независните кандидати, според него, ќе бидат непрепознатливи на ливчињата бидејќи пред нивното име ќе стои само група граѓани, но не и кој ги поддржува. За тоа дека дел од независните кандидати може да повлечат дел од гласовите на СДСМ, рече дека се сложува дека има некаква компатибилност, но оти важно е тие да се вистински независни кандидати и оти се сомневаат во некакви бизнис и политички влијанија, особено во Центар, за што, како што најави, ќе изнесат информации во следниот период. – Нека знаат граѓаните, на кого треба да ја дадат довербата, рече Филипче.
Повтори дека во отсуство на реални резултати, владејачката партија целосно се потпира на дезинформации и медиумски спинови поврзани со него, како што беше оној поврзан со фотографијата на кој е на јахта заедно со поранешниот лидер на СДСМ Зоран Заев.
Според него, граѓаните веќе чувствуваат последици од неспособноста на власта посочувајќи на зголемувањето на цените, слабите економски политики и изостаната визија. СДСМ, според него, останува фокусиран на реалните проблеми и на борбата за економски и социјален напредок.
Филипче, меѓу другото, ја оцени како целосно манипулативна мерката на Владата со која се тврди дека цените на школскиот прибор се намалени за 15 проценти.
– Ние направивме анализа, А4 тетратките за децата се поскапени 30 проценти во споредба со почетокот на годината. Детските ранци се дупло поскапени, а сега Владата ќе ги намалува за 15 проценти“ рече претседателот на СДСМ.
Во однос на растот на платите, Филипче рече дека „во времето на СДСМ, индексно гледано, биле 11 проценти, а сега е 4 проценти. – Ако сакате во номинални бројки – растот на платите тогаш беше 15 проценти, а сега е само 8 проценти, изјави тој.
Соред Филипче, лошите економски резултати се единствената причина поради која власта постојано се враќа на црни кампањи.
