Претседателот на СДСМ, д-р Венко Филипче во вечерашното гостување на Сител Телевизија рече дека верува дека е препознаен позитивниот и искрен пристап и квалитет на кандидатите за градоначалници и советници на СДСМ низ општините по што верува дека на 19 октомври граѓаните ќе го направат вистинскиот избор кој ќе донесе напредок во државата.
„Мислам дека направивме една прилична, чесна, искрена кампања, собравме огромен број на граѓани. Верувам дека ќе го препознаат нашиот позитивен, искрен пристап, дека ќе ги препознаат квалитетите на нашите кандидати и за градоначалници, и за советници. Па, еве, најдобрата анкета ќе биде во недела на 19 октомври”, рече Филипче.
Претседателот на СДСМ Филипче на Сител ги повика граѓаните да излезат на гласање и да одлучат како ќе се развиваат нивните општини, притоа напоменувајќи дека граѓаните веќе почувствуваа што значи лош избор спомнувајќи ја градоначалничката на Скопје, но и останатите градоначалници на ДПМНЕ кои реализираа само 30% од ветената програма.
„Мислам дека е многу важно да излезат на гласање. Мислам дека тоа е единствениот начин да влијаат на тоа како ќе се развиваат нивните средини за живеење. Видовме како се живее во Скопје, благодарение на борбата, лошиот избор на ВМРО-ДПМНЕ, нивните непринципиелни коалиции и откако се скараа со градоначалничката градот е целосно блокиран. Тука мислам дека огромен грев имаат кон Скопје, да ништо не е мрднато напред, а и во другите градови, кај што програмата на градоначалниците на ВМРО-ДПМНЕ не е реализирана ни повеќе од 30%, наспроти нашите градоначалници кои ќе имаат близу 100% реализирана програма. Така дека граѓаните да излезат на гласање, тоа е нивна одговорност, ние сите бираме во какви средини, во каква држава ќе живееме”, потенцираше Филипче во Сител.
