Филипче за протестите на ДУИ денеска испрати јасна порака. Нагласи дека правото на протест е уставно загарантирано. Но предупреди дека тоа право не смее да се користи за политички манипулации.
– Правото на протест е основно демократско право, но апсолутно не сметам дека треба да се злоупотребува во политички цели, изјави Филипче одговарајќи на новинарски прашања при чествувањето на 122 години од смртта на Гоце Делчев.
Покрај ставот за протестите, Филипче откри детали за тековните подготовки за локалните избори. Процесот за избор на кандидати е во напредна фаза, а дел од имињата – меѓу кои и актуелни градоначалници – веќе се познати.
– До крајот на јуни очекуваме целиот процес да биде завршен. Ќе ги промовираме најдобрите кандидати од сите општини – луѓе со кредибилитет, капацитет и јасна визија за развој, додаде тој.
Воедно, во СДСМ активно се работи и на градење сојузи за претстојниот изборен циклус. Разговорите со потенцијалните коалициски партнери се во различни фази: некои преговори се при крај, некои се во тек, а трети сè уште не се започнати.
– Целта е јасна – стабилни и вредносни коалиции за успех на изборите, истакна Филипче.
Извор: Миа
