Европските лидери ја осудија одлуката на Израел да го спречи латинскиот патријарх на Ерусалим да влезе во црквата на Светиот Гроб и да сослужува литургија на празникот Цветници, оценувајќи го овој чин како прекршување на верските слободи и на статусот на светите места.
„Спречувањето на влез на патријархот на Ерусалим и кустосот на Светата Земја, особено на празник кој е во центарот на верата како што се Цветниците, претставува навреда не само за верниците, туку и за секоја заедница која ја признава слободата на вероисповед“, порача италијанската премиерка Џорџа Мелони.
Италијанската влада изрази силна поддршка за латинскиот патријарх на Ерусалим, Пјербатиста Пицабала, кому му беше оневозможено да одржи миса. „Црквата на Светиот Гроб во Ерусалим е свето место за христијанството и како такво мора да биде зачувано и заштитено за извршување на светите обреди“, се додава во соопштението.
Полицијата го одби барањето на Патријаршијата за изземање
Израелската полиција го спречи латинскиот патријарх на Ерусалим да ги одбележи Цветниците во црквата на Светиот Гроб „за првпат по повеќе векови“, соопштија од Патријаршијата, наведувајќи дека полицијата се повикала на безбедносни причини поврзани со војната со Иран.
Кардиналот Пјербатиста Пицабала и францисканецот Франческо Иелпо биле сопрени додека пеш се движеле кон црквата. Од друга страна, израелската полиција тврди дека сите свети места во Стариот град на Ерусалим, вклучувајќи ги христијанските, муслиманските и еврејските, се затворени за верници од почетокот на војната на САД и Израел против Иран, особено локациите кои немаат соодветни засолништа. Полицијата потврди дека го одбила барањето на Патријаршијата за посебен третман на денот на празникот.
Макрон: Ја осудувам оваа одлука
Остра критика упати и францускиот претседател Емануел Макрон. „Ја осудувам оваа одлука на израелската полиција, која дополнително придонесува за загрижувачкиот пораст на прекршувањето на статусот на светите места во Ерусалим“, напиша тој на социјалната мрежа Х.
Изразувајќи му поддршка на патријархот, Макрон додаде: „Слободното практикување на верата во Ерусалим мора да биде загарантирано за сите религии“.
Португалија: Почитувајте ја слободата на вероисповед
Португалија исто така реагираше на одлуката, нарекувајќи ја „длабоко загрижувачка“. „Оневозможувањето на пристапот на кардиналот Пицабала до црквата на Светиот Гроб на Цветници, и тоа за обред кој требаше само да се пренесува, заслужува силна осуда“, објави португалското Министерство за надворешни работи, повикувајќи ги израелските власти да ја „осигураат и почитуваат слободата на вероисповед и богослужба“.
