Јавен обвинител од ОЈО Тетово изврши увид на лице место во Шипковица, каде при изградба на потпорен ѕид вчера загинаа двајца работници.
Издадена е наредба за обдукција на телата на починатите, а јавниот обвинител нареди да се обезбеди и целокупната документација од правниот субјект кој ги ангажирал работниците, како и документацијата од општината поврзана со изградбата на ѕидот. На лице место беше повикан и Државниот трудов инспекторат, кој ќе изготви извештај.
„Во насока на утврдување на причините и проверка на целиот настан, се испитуваат повеќе лица“, велат од обвинителството.
Вчера врз две лица кои изведувале градежни работи во тетовското село Шипковица паднал ѕид при што се здобиле со тешки телесни повреди од кои починале.
Загинатите се 63-годишниот А.А. од тетовското село Селце и 50-годишниот Џ.Ц., државјанин на Република Албанија.
