Осумнаесет притвореници биле евакуирани за време на пожарот што изви синоќа во притворското одделение во затворот во Битола.
Службените лица во затворот најпрво со противпожарни апарати се обиделе самите да го изгасат пожарот, но бидејќи не успеале веднаш почнале со евакуација на 18 притворени лица кон шеталиштето за притворени и повикале надворешно обезбедување, пожарна и брза помош. Пожарот бил за кратко време локализиран.
Како што објави вчера „Макфакс“ притворениците биле пренесени во други казнено-поправни установи.
„Сите притворени лица согласно наредбите на надлежните судови биле преместени во други притворски одделенија во КПУ Затвор Скопје и во КПУ Затвор Охрид, со полициска асистенција“, велат од Управата за извршување на санкции.
Дел од вработените лица биле упатени на превентивни прегледи во Клиничката болница во Битола, при што за среќа нема повредени притворени и вработени лица од Установата.
Надлежните истражни органи дополнително ќе ги утврдуваат можните причинители за пожарот.
