Цела Влада е вклучена во преговори со едно село во североисточна Мкедонија да ги убеди граѓаните да плаќаат сметки за струја, нешто што по природа треба да го прават. Вака претседателот на ВМРО-ДПМНЕ ги коментираше блокадите на мештаните во Слупчане кои не им дозволуваа на екипите на ЕВН да влезат во селото откако уништија дел од инфраструктурата.
„Во Вевчани има 2500 жители, натплатата е повеќе од 90 отсто, зошто овие граѓани да бидат од втор ред, дали треба да ги дигнат во воздух трансформаторите за да привлечат внимание. Не смее да има привилегирани, не смее во Слупчане луѓето да се привилегирани“, рече Мицкоски.
При првите нереди предизвикани од жителите на Слупчане ова лето, од Електродистрибуција потенцираа дека кражбите на електрична енергија во ова село се 80, а наплатата е само 20 проценти.
Од Слупчане неделава побараа сите новоизградени куќи да добијат бесплатен приклучок на мрежа, да се постави ограничена цена од 3.000 денари по семејство без разлика колку струја е потрошена и верските објекти да бидат ослободени од обврската за плаќање струја.
