Во пресрет на вториот изборен круг, членови и поранешни функционери на СДСМ јавно застануваат зад кандидатот за градоначалник на Карпош, Стевчо Јакимовски. Пораките се јасни – опозициската партија мора безусловно да ги поддржи опозициските кандидати во сите општини, со цел зачувување на кредибилитетот и политичката конзистентност.
„СДСМ како опозициска партија мора секогаш и секаде, безусловно да ги поддржи опозициските кандидати, без калкулации и без исклучок. Ако некој има проблем со тоа – има проблем со разбирање политика“, напиша на платформата X висок функционер на СДСМ, д-р Андреј Петров. Тој додаде дека „во Карпош и Скопје опозицијата што СДСМ мора да ја поддржи заради сопствен кредибилитет, се Стевче и Амар“, нагласувајќи дека „во политиката само прецизните ставови нешто значат“.
Сличен став сподели и поранешниот пратеник и директор, Јани Макрадули, кој во објава на Фејсбук потсети дека СДСМ има историска одговорност да биде активен чувар на демократските вредности и европската ориентација на државата.
„Многу луѓе, за жал, со доаѓањето на ВМРО-ДПМНЕ ќе останат без работа. Затоа, да не заборавиме дека политичката историја нѐ учи — нема позитивен пример од гласање за ВМРО-ДПМНЕ. Денес и до недела, приоритет мора да се чуварите на победата, мобилизацијата за гласови, а не празни соопштенија и копирани постови“, напиша Макрадули.
Тој повика на активност и свесност за вредностите што ги претставува СДСМ, додавајќи дека „тоа чувство се гради со време, со посветеност и искуство — од лепење плакати, до борби во парламентот“.
Со ваквите пораки, СДСМ во Карпош испраќа сигнал за поголема мобилизација и политичка координација во поддршка на Јакимовски и опозициските кандидати во Скопје пред завршницата на изборната трка.
