Бугарскиот парламент денеска донесе закон со кој рафинеријата на руската групација „Лукоил“ во Бургас, најголемата компанија во земјата, се става под државна контрола. Оваа одлука е директен одговор на американските санкции воведени во октомври против рускиот нафтен гигант.
Бугарската влада изрази загриженост дека санкциите, кои стапуваат на сила на 21 ноември, би можеле да доведат до целосно прекинување на работењето на рафинеријата „Нефтохим“ во Бургас.
„Американските санкции… ќе доведат до прекин на работењето на рафинеријата (…) поради одбивањето на сите страни да вршат плаќања на компаниите што припаѓаат на Лукоил“, објасни мнозинската партија при поднесувањето на предлог-законот.
Со новиот закон, Владата на Бугарија ќе назначи посебен менаџер кој ќе управува со рафинеријата, во која „Лукоил“ индиректно поседува 99,85% од акциите. Менаџерот ќе биде овластен, со одобрение од Владата, да продава акции по евалуација на пазарот.
Законот беше усвоен по забрзана постапка, што предизвика остри критики од опозицијата. Опозициските пратеници го обвинија мнозинството дека состанокот на собраниската Комисија за енергетика траел едвај 30 секунди.
Исто така, беше изразена загриженост дека можноста администраторот да ги продаде акциите може да доведе до судска постапка против Бугарија.
