По пауза од 17 години, спортска во Битола, „Боро Чурлевски“ ќе биде мегданот на завршниот турнир од Купот на Македонија (15-17 февруари). За трофејот „Благоја Георгиевски – Буштур“ ќе се борат осум екипи. Бранител на титулата е МЗТ Скопје. Домаќинот на завршниот турнир Пелистер денеска организираше прес-конференција на која присуствуваа претставници на екипите учесници, пред чиј почеток МЗТ Скопје го доби големиот преоден пехар во трајна сопственост. Аеродромци веруваат во своите сили и најавуваат освојување по 12. на ова натпреварување. Бранителот на трофејот и фаворит на оваа завршница МЗТ Скопје на патот кон оставрување на целта за прв противник ќе го има Гостивар кој е предводен од искусниот и трофеен македонски стратег, некогашниот селектор Јорданчо Давитков. Чаир за противник ќе го има Еуро Никел, а Работнички битката за освојување на 11. трофеј и израмнување со најтрофејниот во ова натпреварување, градскиот ривал, ќе треба во четвртфиналето да го совлада ТФТ. Домаќинот Пелистер завршницата ќе ја почне со пресметка против Феникс.
