Министерството за безбедност на Босна и Херцеговина упати итно барање до Европската Унија за сателитско снимање на подрачјето на Херцеговина, со цел навремена проценка на можниот ризик од поплави по обилните врнежи во изминатите денови. Како особено загрозена се посочува областа на горниот тек на реката Неретва, која кон крајот на 2024 година беше погодена од сериозни поплави и свлечишта. Според Министерството, северниот дел на Херцеговина треба да биде опфатен со снимање преку европската служба за управување со вонредни состојби „Коперник“. Целта на оваа активност е што побрзо да се утврди влијанието на врнежите врз веќе погодените подрачја, како и да се направи детална проценка на евентуалната штета.
Добиените сателитски податоци ќе им помогнат на надлежните институции поефикасно да ги планираат и спроведат мерките за заштита и спасување. Соработката со Европската Унија се реализира преку Механизмот за цивилна заштита на ЕУ, во кој Босна и Херцеговина е полноправна членка од 2022 година, што овозможува побрза меѓународна реакција во кризни ситуации. Во есента 2024 година, силните дождови предизвикаа катастрофални поплави и лизгања на земјиштето во северна Херцеговина и централна Босна, при што животот го загубија 27 лица. Најтешко беше погодена општина Јабланица, каде загинаа 19 луѓе.
