Во дводневна посета на НУ Библиотека „Григор Прличев“ од Охрид доаѓаат претставници од Градската библиотека од Нашице – Република Хрватска.
Во 11 часот во Прличевата одаја директорките на двете установи Христина Трпеска и Марија Буха ќе потпишат Протокол за соработка.
Планирана е соработка во подобрувањето на научните, стручните, образовните, издавачките и културните активности во рамките на спроведувањето на работните програми на двете институции. Формите на соработка во иднина може да бидат: размена на знаења и искуства, размена на публикации и други материјали. заедничко користење на човечки и технички ресурси и заедничка организација на научни и стручни програми, проекти од други меѓународни фондови, како и промотивни активности.
По потпишувањето на протоколот ќе следи и промоција на книгата „Македонија така далечна, а така блиска“ од авторот Драгољуб Сиљаноски, преку кого се реализира идејата за збратимување на двете библиотеки. Настанот ќе биде поддржан и од Хрватско – македонската заедница во Охрид.
Книгата е печатена со финансиска поддршка на Советот за националните малцинства на Република Хрватска.
Сиљаноски е роден 1961 година во Кичево. Дипломирал на Економскиот факултет во Осиек. Од своето доаѓање во Хрватска, во 1972 година, па сé до денес, живее и работи во Нашице. Активно учествува во работата на македонските друштва во Осиек и Загреб, член е на Македонското културно друштво „Браќа Миладиновци“ од Осиек, член е на одборот на претставници на македонското национално малцинство во Република Хрватска, а претставник е на македонското национално малцинство за Осиечко-барањската жупанија.
Авторот на оваа книга, собирал разгледници десетина години и успеал да собере стотина. Сакајќи да ја претстави културата и историјата на својата родна Македонија, одбрал разгледници кои донесуваат мотиви од Македонија, а адресирани на лица од Хрватска. Презентираните разгледници покриваат временски период од Првата светска војна до денес и прикажуваат разни мотиви од Македонија.
Книгата ќе ја промовираат професорот по историја м-р Михаил Патчев и м-р Милчо Јованоски, виш библиотекар.
Делегацијата од Нашице во сабота на 21 јуни ќе се приклучи во уште еден проект на Библиотеката од Охрид – „Слушни го Езерото“ во чест на Денот на Охридското Езеро.
