Аеродромот во Берлин утрово објави дека сите полетувања се откажани поради временските услови, бидејќи регионот на германската престолнина беше погоден од нов снег и замрзнат дожд.
„Моментално нема полетувања на аеродромот Берлин Бранденбург поради временските услови“, објавија тие, објаснувајќи дека авионите не можеле да се одмрзнат поради дождот, кој веднаш замрзнал.
Прекинот влијае само на заминувањата, а дојдовните летови сè уште можат да слетуваат, рече портпаролката. Не е познато колку долго ќе бидат суспендирани полетувањата.
Затоа, патниците можат да очекуваат откажувања на летови и значителни доцнења и им се препорачува да ја проверат состојбата на своите летови кај авиокомпаниите.
Германската метеоролошка служба (DWD) предупреди на висок ризик од опасни ледени услови во Берлин поради замрзнат дожд и мраз.
