Атлетико Мадрид за малку ќе „прокоцкаше“ водство од 0:3, но се врати за 5:2 победа на гости кај Реал Валјадолид за да остане на третото место на табелата во Ла лига со два поени зад градските ривали, Реал Мадрид.
Во фуриозни 15-тина минути во првото полувреме, тимот на Диего Симеоне направи предност од 0:3. Нахуел Молина го отвори резултатот во 20. минута, четири минути подоцна, Хозе Хименез зголеми на 0:2, за Алваро Мората во 38. минута да го постигне и третиот гол.
Но, Валјадолид, кои се обидуваат да осигураат опстанок во шпанската елита, прво намалија на 1:3 со гол од пенал на Кајл Ларин во 42. минута, за во 74. минута, Серхио Ескудеро да даде надеж за реми, пред Хоакин Фернандез да си постигне автогол во 86. минута за 2:4, пред Мемфис Депај во 93. минута да постигне убав соло-гол за конечни 2:5.
