Советничката група на ВМРО-ДПМНЕ и Коалицијата одговорно тврди дека сите одлуки предложени од страна на Данела Арсовска до Советот на Град Скопје поврзани со „Комунална хигиена“ се прифатени и изгласани од страна на советниците на ВМРО-ДПМНЕ, соопшти партијата.
„Апелираме да каже која одлука врзана со тековното работење на „Комунална хигиена“ не е изгласана од советниците? Тезата на Арсовска дека овој проблем е намерно создаден е површна, неточна и нелогична: зошто ВМРО-ДПМНЕ во сред изборна кампања би го оставило Скопје во ѓубре, ако се знае дека товарот и негативата ќе одат на сметка на ВМРО-ДПМНЕ?“, реагира партијата.
Арсовска треба да одговори зошто не се собира ѓубре? Што се прави со парите кои граѓаните уредно ги плаќаат, прашува ВМРО-ДПМНЕ.
„Апелираме да се испита и кривичната одговорност на надлежните за ваквиот хаос од кој страдаат скопјани. Ова го прави некој што сака да наштети на ВМРО-ДПМНЕ во изборна кампања, а тоа е тајната коалиција која ја поддржуваше Арсовска и ја раководеше 4 години. Ќе дојде крајот на ова и ќе има одговорност“, соопшти ВМРО-ДПМНЕ.
