Пицата е кулинарски симбол на Италија за 89 отсто од Италијанците, покажува истражувањето нарачано од италијанското земјоделско лоби „Колдирети“ по повод Светскиот ден на пицата, кој се слави на 17 февруари.
Во истражувањето спроведено од Ипсос, Италијанците ја рангираа пицата над пастата (88 проценти) како нешто што најдобро ја претставува италијанската кујна. Виното има 59 отсто гласови, а капучиното 51 отсто.
Поздравувајќи ја пицата како „богатство направено во Италија“, Колдирети ја истакна улогата на пицата во италијанското општество, особено меѓу семејствата, истакнувајќи дека околу една третина од Италијанците редовно прават пица маргарита дома.
Според легендата, маргарита била измислена во јуни 1889 година во чест на кралицата Маргарита од Савој, кога пица мајсторот од Неапол, Рафаеле Еспозито, направил пица прелиена со домати, моцарела и босилек, што ги претставува боите на италијанското знаме.
Со проценет годишен обрт од 15 милијарди евра, пицата е голем бизнис во Италија, каде секоја година се печат 2,7 милијарди пици – според „Колдирети“, за што се потребни 200 милиони килограми брашно, 225 милиони килограми моцарела, 30 милиони килограми маслиново масло и 260 милиони килограми сос од домати.
Светскиот ден на пицата, познат во Италија како Giornata Mondiale della Pizza, се одржува на денот на празникот на Антонио Абате – или Свети Антони Абате – светецот заштитник на животните кои пица мајсторите исто така ги сметаат за свој покровител.
