Според најновата анкета на јавното мислење спроведена од британската агенција ЈуГов (YouGov), доколку се одржат општи избори оваа година, Реформската партија на Најџел Фараж би освоила најмногу места во Долниот дом на британскиот парламент.
Според резултатите од анкетата, Реформската партија би освоила 271 место, додека Лабуристите би освоиле 178 места, што е значителен пад во споредба со 411 минатата година.
Конзервативците, попознати како Ториевци, би паднале на четвртото место со само 46 пратеници, по нив следуваат Либералните демократи, кои би го зголемиле бројот на места од 72 на 81, според резултатите од анкетата објавени денеска од Скај Њуз.
Шкотската национална партија (СНП) би ја задржала својата позиција како најголема партија во Шкотска, додека Зелената партија на Англија и Велс и Плаид Кимру (Plaid Cymru) – Партијата на Велс би освоиле по седум места (по три места повеќе).
Можна опција би била сојуз на Реформската партија и Конзервативците со 317 места, ист број како и владата на Тереза Меј во 2017 година, со поддршка на Северноирската демократска унионистичка партија.
Заедничкиот резултат на Лабуристите и Конзервативците е само 41 процент поддршка, додека минатата година беше 59 проценти, што укажува на длабока фрагментација на гласачкото тело.
Според резултатите, кога ќе се распределат гласовите, 26 проценти би отишле кај Реформската партија на Фараж, 23 проценти кај Лабуристите и 18 проценти кај Конзервативците.
Кога станува збор за помалите партии, Либералните демократи би добиле 15 проценти од гласовите, Зелените 11 проценти, Шкотската национална партија три проценти, а Велшката партија еден процент од гласовите.
Во дури 99 проценти од симулациите, Реформската партија би била прва, додека ситуацијата без парламентарно мнозинство би се повторила во околу 97 проценти од случаите.
Само во девет проценти од сценаријата, Реформската партија и Конзервативците заедно формираат влада, додека веројатноста за коалиција на Лабуристите и Либералните демократи е минимална.
Долниот дом е еден од двата дома на британскиот парламент и е главното законодавно тело во Обединетото Кралство, каде што седат избраните пратеници кои донесуваат закони, го одобруваат буџетот и ја надгледуваат работата на владата.
Долниот дом има 650 членови, секој пратеник претставува една изборна единица, а за парламентарно мнозинство се потребни најмалку 326 пратеници.
