Задоволство и чест ми беше да бидам дел од денешниот марш организиран од СВР Струмица, кој се одржа на релација од с. Банско до водопадите кај с. Габрово и назад – вкупно 11 км. Овој настан беше можност за дружење со колегите кои секојдневно, со посветеност и пожртвуваност, ја обезбедуваат јавната безбедност во Струмица и регионот, напиша на Фејсбук директорот на БЈБ, Александар Јанев.
Маршот не беше само физичка активност, туку и силен симбол на заедништво, доверба и солидарност. Неформалните разговори со колегите ми потврдија дека во полицијата имаме не само исклучителни професионалци, туку и луѓе со срце, совест и чувство за одговорност. Нивната енергија и искреност ме мотивираат и потврдуваат дека полицијата има вистински херои, подготвени да дадат повеќе од потребното, истакна Јанев.
Цел моја и на мојот тим е да создадеме услови во кои секој припадник на полицијата ќе се чувствува почитуван, поддржан и мотивиран да продолжи да ја извршува својата работа со посветеност, етика и храброст, дециден е Јанев.
Благодарам на сите 250 колеги од СВР Струмица за денешното дружење, за нивната посветеност и за примерот што го даваат.Заедно, со искреност и меѓусебна почит, продолжуваме да градиме полиција која ќе ужива доверба и која ќе биде посилна и поефикасна во обезбедувањето на безбедноста на нашите граѓани, додава Јанев.
