Третиот тенисер во светот, Шпанецот Карлос Алкараз ќе го пропушти Мастерсот во Монте Карло
Алкараз изминативе денови тренираше со преврзана рака, но очигледно не успеа да ја санира повредата добиена на Мастерсот во Мајами, па исто како и лани ќе го пропушти првиот голем турнир на земјена подлога.
Шампионот на Индијан Велс со добар резултат во Кнежеството можеше да му се доближи на Новак Ѓоковиќ во борбата за првото место, но повредата го спречи во тоа.
-Работев во Монте Карло и до последен момент се обидував да се опоравам од повредениот мускул на десната рака, но тоа не беше можно и не можам да играм! Навистина со нетрпение го очекував… Се гледаме следната година! – напиша Алкараз на социјалните мрежи.
Останува да се види дали Алкараз ќе може да се опорави за турнирот од серијата 500 во Барселона, кој започнува на 15 април.
Местото на Алкараз во ждрепката како среќен губитник ќе го заземе Италијанецот Лоренцо Сонего, а во второто коло ќе се сретне со Феликс Огер-Алиасиме.
