Денеска во Брисел, амбасадорите на земјите членки на Европската Унија едногласно одлучија да ѝ овозможат на Албанија да ги продолжи преговорите за полноправно членство во ЕУ, објави Бугарското национално радио (БНР). Оваа одлука дојде по долгата блокада од страна на Грција, која беше поврзана со случајот на Фреди Белерис, етнички Грк и избран градоначалник на Химара. Белерис беше уапсен и осуден на две години затвор поради предизборен поткуп, што го спречуваше да положи заклетва како градоначалник. По излегувањето од затвор на почетокот на септември, по отслужување на две третини од казната, Грција го повлече ветото, отворајќи ѝ на Албанија пат кон понатамошни преговори за членство.
Следната меѓувладина конференција ЕУ – Албанија е закажана за 15 октомври во Луксембург, кога ќе биде отворено првото поглавје во преговорите – „Темелни вредности“. Оваа одлука воедно значи и одвојување на Албанија од Северна Македонија во европскиот интегративен процес, нешто што долго време беше избегнувано со цел двете земји да го продолжат патот кон ЕУ во ист пакет.
Во јули 2022 година, и Северна Македонија и Албанија ги одржаа своите први меѓувладини конференции, по што започна скрининг процесот за двете држави. Но, додека Албанија успеа да го надмине ветото од Грција, Северна Македонија останува блокирана поради неусвојувањето на уставните измени. Бугарските медиуми известуваат дека на денешниот состанок во Брисел воопшто не била дискутирана темата за продолжување на преговорите со Северна Македонија, бидејќи земјата не ги вметна Бугарите во Уставот, што беше договорен услов за одржување на втората меѓувладина конференција.
Ова значи дека и покрај долготрајните заложби за заеднички пристап кон Албанија и Северна Македонија во процесот на европска интеграција, на 15 октомври двете земји конечно ќе тргнат по различни патеки. Албанија ќе го отвори своето прво поглавје, додека Северна Македонија ќе остане заглавена во процесот, чекајќи го решението на внатрешно-политичките прашања поврзани со уставните измени.
