Лидерот на Алијанса за Албанците, Арбен Таравари, вечерва по состанокот на Централното претседателство и раководствата на ограноците на партијата, соопшти дека донеле едногласна одлука на претстојните локални избори да настапат самостојно, со свои кандидати и листи за градоначалници.
Одлуката е донесена поради тоа што, според Таравари, предлогот на останатите лидери во коалицијата Вреди, кандидатите за градоначалници да ги избираат партиските лидери, а не врз основа на сондажи и анкети меѓу граѓаните – како што предлагала АА – бил целосно неприфатлив.
„И ултиматумот кој ни го поставија од Вреди, да одговориме до денеска, исто како и предлогот лидерите сами да ги изберат кандидатите, за нас не е прифатлив и го отфрламе“, изјави Таравари.
На новинарско прашање дали ова значи крај на коалицијата Вреди, Таравари не даде конкретен одговор. Остана нејасно дали АА останува дел од коалицијата или ќе настапи целосно самостојно и на парламентарно ниво.
