Лондон, 21 мај 2020 (МИА) – Кај клубовите во долните дивизии на Англиската фудбалска лига (ЕФЛ) ќе има промоција или испаѓање, ако сезоната 2019-2020 биде прекината поради пандемијата од коронавирус, објавија од лигата.
Одборот соопшти дека ја финализирал рамката што ќе се донесе во правилата во случај на прекинување на кампањата, велејќи дека е потребно 51 отсто мнозинство за предвремен крај на сезоната во која било од дивизиите. Клубовите во Лига 2 (четврто ниво) во Англија гласаа едногласно за крајот на својата сезона минатата недела, додека во Лига 1 клубовите не успеаја да се договорат за крајот на нивната кампања. Клубовите од Чемпионшип ќе гласаат оваа недела.
– Обновувањето на сезоната 2019-20 во сегашниот формат останува најсоодветно решение во однос на зачувување на интегритетот на првенството. Но, Одборот прифаќа дека постојат околности што можат да доведат до прекинување (како што се покажа во Лига 2) или ситуација што последователно би довела до крајот на сезоната, се вели во соопштението од ЕФЛ.
Лигата додаде дека конечниот пласман ќе се одлучи врз основа на „просечен број на освоени бодови по натпревар“ доколку е потребно, со останување на промоцијата и испаѓањето. Според системот, Свиндон, Кру Александриа и Плимут Аргајл ќе добијат автоматска промоција во Лига 1. Стивениџ ќе падне.
– Принципот на испаѓање во трите дивизии е неразделен од интегритетот на пирамидата, од Премиер лигата до Националната лига, ако се осигураме дека Националната лига ќе ја започне сезоната 2020-21. Екипите од Лига 2 се распоредуваат во Националната лига – петто ниво на англиската фудбалска пирамида. Плеј-офот ќе треба да се игра со четири екипи од секоја дивизија за да се одреди кој ќе освои промоција, но доколку отпаднат од сметките, Одборот на ЕФЛ ќе одлучи што да прави во тој случај. Одборот отсекогаш знаел дека единствена одлука не може да ги задоволи сите клубови. Но, ние сме во фаза кога се потребни силни и цврсти одлуки за доброто на лигата и на сите нејзини членови, рече претседателот на ЕФЛ, Рик Пари.
