Во јуни минатата година беше промовиран проектот на Агенцијата за млади и спорт (АМС) наречен „Младинска картичка“ со која младите од 15 до 29 години имаат попусти и поволности во различни категории. Апликациите за картичката започнаа уште во јули, наредниот месец. За да се добие истата се аплицира онлајн, а потоа може да се подигне во Агенцијата за млади и спорт или на апликантите да им биде доставена по пошта. Меѓутоа поради неисполнување на предвидените услови, не сите кои аплицирале ја добиле истата.
„Заклучно со 1 мај 2020 година, младинската картичка досега е издадена на 4.220 лица, а аплицирале повеќе од 4.500, но не ги исполнувале предвидените критериуми како бараната возраст, неправилна фотографија, неколку пати аплицирано од едно лице, итн.“ – изјавија од Агенцијата за млади и спорт за Мета.
Со користење на младинската картичка предвидени се попусти од 5 до 50 проценти во хотели, кафулиња, ресторани, театри, киносали, транспорт, железница, цвеќари, најразлични шопинг продавници, фото студија, фризерски и салони за убавина, туристички агенции, спортски центри, стоматолошки ординации, книжари, итн. Најголемиот дел од бенефициите се во областа на хотелиерство и угостителство.
„Потпишани се вкупно 360 меморандуми за соработка и истите се потпишуваат на неопределено време“ – велат од Агенцијата.
Оттаму посочуваат дека соработката со партнерите продолжува по вонредната состојба.
„Следува и склучување нови меморандуми со нови субјекти во различни категории, како и процес на дигитализација на картичката, односно мобилна апликација со која ќе се овозможи лесно и едноставно користење на истата“ велат од АМС.
